見到一間 £300,000 嘅樓，係咪準備好首期，就代表買得起？其實未必。
英國買樓除咗樓價同 Deposit，成交前後仲有幾項支出。如果一開始冇計落 Budget，去到後段先發現差幾千甚至過萬鎊，就會相當被動。
① Stamp Duty Land Tax（SDLT）
如果物業喺英格蘭或北愛爾蘭，買樓一般要先判斷自己屬於邊一類買家，例如首置、自住換樓、額外物業／Buy-to-Let，以及有冇涉及非英國居民附加稅率。
所以同一間 £300,000 物業，唔同買家身份，Stamp Duty 可以差好遠。而蘇格蘭及威爾斯使用嘅物業交易稅制度亦唔同，唔應該直接套用英格蘭 SDLT。
② Solicitor / Conveyancing Fee
英國買樓通常會由 solicitor 或 licensed conveyancer 處理法律程序，例如查業權、合約、Searches、資金及完成交易等。
報價時最好睇清楚係咪已經包括 Search fees、Land Registry 費用、銀行轉帳費，以及其他 disbursements。
③ Survey
銀行做 valuation，主要係保障銀行借出去嘅錢，唔等於幫你做完整驗樓。
尤其買較舊嘅樓，買家可以考慮另外安排 Home Survey；如果物業結構、樓齡或狀況較複雜，可能需要更深入調查。有時幾百鎊嘅 Survey，反而可以令你及早發現一個幾千甚至幾萬鎊嘅問題。
④ Mortgage-related costs
如果需要按揭，亦可能涉及 Mortgage product / arrangement fee、valuation fee、broker fee，以及其他貸款相關費用。
有啲 Mortgage Fee 可以加落貸款，但要留意：加落按揭 ≠ 免費。因為之後可能連利息一齊供。
⑤ 搬入去之後嘅第一筆錢
成交唔代表支出完結。仲可能有裝修、傢俬、家電、維修、Buildings Insurance；如果係 Leasehold，亦可能有 Service Charge 等持續成本。
如果係 Buy-to-Let，就更加要預留維修、空置期、保險、管理費，以及其他出租相關成本。
💡 最容易犯嘅錯
好多買家計 Budget：樓價 − 按揭 = 我要準備嘅現金。
但比較完整嘅概念應該係：Deposit + 稅項 + 法律費 + Survey + Mortgage相關費用 + 搬入／維修預備金。
買得起樓價，唔代表負擔得起成個買樓過程。
真正嘅 Budget，應該係成交之後，戶口仍然有足夠現金應付生活同突發支出。
以上為一般資訊，實際稅務、法律及按揭安排應按個人情況向相關專業人士確認。
下一集：《英國物業》EP.3｜英國買樓，應該落幾多首期？10%、20%、25%有咩分別？